Parc Coedwig Gwydir - Mainc Lifio, ger Llanrwst

Croeso

Mainc Lifio yw'r man cychwyn ar gyfer llwybr cerdded byr a dau lwybr beicio mynydd o fri.

Mae’r llwybrau cerdded yn cynnwys nodweddion hanesyddol ac mae golygfeydd dros Ddyffryn Conwy.

Mae’r llwybrau beicio mynydd yn cynnwys Gwydir Mawr sy’n glasur go iawn a llwybr Gwydir Bach sy’n fyr a chryno.

Llwybrau cerdded

Mae arwyddbyst ar y llwybrau cerdded o’r dechrau i’r diwedd.

Chwiliwch am y panel gwybodaeth ar ddechrau’r llwybr.

Dysgwch beth yw ystyr graddau’r llwybrau cerdded.

Llwybr yr Arglwyddes Mair

• Gradd: Cymedrol
• Pellter: 1¼ milltir/2.1 cilomedr
• Amser: 1 awr
• Gwybodaeth am y llwybr: Mae'r llwybr yn eich arwain drwy gyfuniad o ffyrdd coedwig llydan a llwybr gydag arwyneb anwastad garw lle gallwch ddisgwyl rhywfaint o fwd, cerrig a gwreiddiau coed. Ceir rhwystr igam ogam ar ddechrau'r llwybr, ac ar ben y bryn cyntaf, gyda bwlch o tua 60 cm i gerdded drwyddo. Byddwch yn mynd drwy rwystr igam ogam arall, gan ddilyn llwybr anwastad garw i ailymuno â ffordd y goedwig lle byddwch yn dilyn y llwybr i'r Llain Fowlio Duduraidd, lle ceir bwrdd picnic a mainc cyn gweld yr olygfa olaf i lawr Dyffryn Conwy ar y ffordd i'r maes parcio.

Mae’r daith gerdded hanesyddol fer hon yn cynnwys rhai golygfannau yn rhoi cipolwg ar hen dref farchnad Llanrwst.

Enwyd y daith gerdded hon ar ôl un o ddwy Fonesig Fair o’r teulu Wynn a brynodd y tir ac a adeiladodd yr Ystâd Gwydir hanesyddol.

Mae’r daith gerdded yn cynnwys dau gerflun gan artistiaid lleol, un yn gofeb i hen Neuadd Tref Llanrwst.

Llwybr Panorama Conwy

• Gradd: Cymedrol
• Pellter: 3.6 milltir/5.8 cilomedr
• Amser: 1½-2½ awr
• Gwybodaeth am y llwybr: Mae’r rhan fwyaf o’r llwybr hwn ar hyd ffyrdd drwy goedwigoedd sydd wedi’u cysylltu gan lwybrau troed byrion garw a chul, llai na 60cm o led mewn mannau, ar arwyneb garw ac anwastad lle bydd mwd, cerrig a gwreiddiau coed. Mae pump o feinciau lle gallwch orffwys ac edmygu’r olygfa.

Ar y daith gerdded hon, fe welwch olygfeydd godidog ar hyd Dyffryn Conwy cyn dringo dros y bryn i olygfan sy’n edrych dros y mynyddoedd mawreddog i’r gorllewin.

Ar y llwybr yn ôl i’r maes parcio, byddwch yn cerdded heibio Caerdroea, ardal o goetir a reolir gan y gymuned, y gallwch gerdded o’i
chwmpas a darllen y paneli gwybodaeth sy’n esbonio gwaith y grŵp.

Byddwch hefyd yn pasio sawl cerflun gan artistiaid lleol, yn adrodd y straeon sy’n cysylltu’r goedwig a thref Llanrwst.

Llwybr sain

Gwrandewch ar hanes yr Arglwyddes Mary o'r teulu Wynn a brynodd y tir ac adeiladu Stad Gwydir.

Bwriadwyd i’r llwybr sain gael ei ddefnyddio ar hyd Llwybr yr Arglwyddes Mair, llwybr cerdded sydd wedi’i arwyddo o faes parcio Mainc Lifio.

Rydym yn argymell eich bod yn lawrlwytho'r llwybr sain i'ch ffôn clyfar cyn eich ymweliad oherwydd gall darpariaeth rhwydwaith symudol fod yn gyfyngedig mewn ardaloedd gwledig.

Sut i ddefnyddio'r llwybr sain

• Lawrlwythwch ffeil mp3 y daith sain o’r adran lawrlwytho ar waelod y dudalen hon (nodwch y bydd y ffeil yn dechrau chwarae ar unwaith pan gliciwch chi ar y ddolen, a bydd angen ichi glicio’r tri dot i’w lawrlwytho i’ch dyfais).
• Dilynwch arwyddion Llwybr yr Arglwyddes Mair o faes parcio Mainc Lifio.
• Cadwch lygad am y pyst wedi'u rhifo ar hyd y llwybr sy'n dangos pa drac sain i'w chwarae nesaf.

Gallwch hefyd lawrlwytho ffeil PDF o sgript y llwybr sain o'r adran lawrlwythiadau ar waelod y dudalen hon.

Llwybrau beicio mynydd

Mae arwyddbyst i’w cael ar bob un o’n llwybrau beicio mynydd o’r dechrau i’r diwedd ac maent wedi’u graddio’n ôl eu hanhawster.

Ceir panel gwybodaeth ar ddechrau’r llwybr – dylech ei ddarllen cyn cychwyn ar eich taith.

• Darganfod ystyr graddau llwybrau beicio mynydd.
• I gael rhestr ein llwybrau beicio mynydd a gwybodaeth er mwyn cynllunio eich taith feicio, ewch i feicio mynydd.
• I gael rhagor o wybodaeth am feicio mynydd yng Nghymru, ewch i wefan Mountain Bike Wales.

Gwydir Bach

• Gradd: Coch/Anodd
• Pellter: 9.1 cilomedr
• Dringo: 350 medr
• Amser: 45 muned-1½ awr

Gwydir Bach yw chwaer fach y brawd mawr, Gwydir Mawr.

Ar ôl dwy ddringfa serth, fyddwch yn haeddu ‘r ddisgynfa orau, o bosib, ar y llwybr cyfan, i gyd ynghlwm mewn un darn cryno.

Gwydir Mawr

• Gradd: Coch/Anodd
• Pellter: 24.8 cilomedr
• Dringo: 800 medr
• Amser: 2-4 awr

Mae Gwydir Mawr yn un o’r llwybrau beicio mynydd gwreiddiol, ac mae’n glasur go iawn!

Mae’r dringfeydd mawr, disgynfeydd mawr, trac sengl gwych a golygfeydd godidog yn ei wneud yn llwybr i’w gofio.

Nawr yn cynnwys adran dwy gilomedr newydd sbon gyda chymysgedd o lwybr traddodiadol cloddiwyd â llaw a nodweddion llwybr llif modern.

Gallwch ddechrau Gwydir Mawr o faes parcio Hafna hefyd.

Parc Coedwig Gwydir

Mae Mainc Lifio ym Mharc Coedwig Gwydir.

Lleolir Parc Coedwig Gwydir yng nghanol Parc Cenedlaethol Eryri ac mae'n amgylchynu pentref Betws-y-coed.

Gwaith cloddio plwm a sinc oedd prif nodwedd yr ardal ac mae gwaddol hen dai peiriant, tomenni sbwriel a chronfeydd dŵr yn nodweddiadol o'r goedwig a geir heddiw.

Mae sawl un o'r mwyngloddiau pwysicaf wedi cael eu hadfer yn rhannol a'u gwneud yn ddiogel i ymwelwyr.

Mae llwybrau ag arwyddbyst yn dechrau o Fetws-y-coed a sawl feysydd parcio eraill Cyfoeth Naturiol Cymru:

• Betws-y-coed - llwybrau cerdded heddychlon drwy'r goedwig ymhell o fwrlwm twristiaid
• Cae'n y Coed - ardal bicnic hawdd dod o hyd iddi a llwybr cerdded gyda golygfeydd panoramig o'r mynyddoedd
• Mwynglawdd Cyffty - llwybr byr trwy rai o hen waith plwm
• Dolwyddelan - llwybr cerdded ar hyd ffordd Rufeinig a llwybr beicio gyda golygfeydd o'r mynyddoedd cyfagos
• Hafna - llwybr cerdded drwy adfeilion hen waith plwm a llwybr beicio mynydd gradd coch
• Llyn Crafnant - llwybrau cerdded o amgylch y llyn a llwybr hygyrch ar hyd glan yr afon
• Llyn Geirionydd - ardal picnic gyda llwybr cerdded heibio i ddau lyn prydferth
• Llyn Sarnau - safle picnic â llwybr cerdded i ddau lyn trawiadol
• Ty’n Llwyn – llwybr cerdded i raeadr enwog Ewynnol

Parc Cenedlaethol Eryri

Mae Parc Coedwig Gwydir wedi’i leoli yng nghanol Parc Cenedlaethol Eryri.

Eryri yw’r Parc Cenedlaethol mwyaf yng Nghymru ac mae’n gartref i drefi a phentrefi hardd a’r mynydd uchaf yng Nghymru.

Awdurdod Parc Cenedlaethol Eryri sy’n gofalu amdano.

I gael mwy o wybodaeth am ymweld ag Eryri, ewch i wefan Awdurdod Parc Cenedlaethol Eryri.

Ymweld yn ddiogel

Rydyn ni eich eisiau chi i ddychwelyd adref yn ddiogel ar ôl eich ymweliad yma.

Rydych yn gyfrifol am eich diogelwch eich hun yn ogystal â diogelwch unrhyw blant ac anifeiliaid sydd gyda chi yn ystod eich ymweliad.

Am gyngor ac awgrymiadau i'ch helpu i gynllunio'ch ymweliad, ewch i dudalen Ymweld â'n lleoedd yn ddiogel.

Newidiadau i gyfleusterau ymwelwyr

Gweler brig y dudalen we hon i gael manylion unrhyw gynlluniau i gau cyfleusterau neu unrhyw newidiadau eraill i gyfleusterau ymwelwyr yma.

Er mwyn eich diogelwch, dilynwch gyfarwyddiadau'r staff ac arwyddion bob amser gan gynnwys y rhai ar gyfer dargyfeirio neu gau llwybrau.

Mae'n bosibl y bydd angen i ni ddargyfeirio neu gau llwybrau wrth i ni wneud gwaith cynnal a chadw neu gynnal gweithrediadau eraill ac mae'n bosibl y bydd angen i ni gau cyfleusterau ymwelwyr eraill dros dro.

Mewn tywydd eithafol, mae'n bosibl y byddwn yn cau cyfleusterau ar fyr rybudd oherwydd y risg o anafiadau i ymwelwyr a staff.

Trefnu digwyddiad ar ein tir

Efallai y bydd angen caniatâd gennym ni i drefnu digwyddiad neu gynnal rhai gweithgareddau ar ein tir.

Gwiriwch a gewch chi ddefnyddio tir rydyn ni’n ei reoli.

Sut i gyrraedd yma

Rydym yn argymell eich bod yn dilyn y cyfarwyddiadau hyn neu’n defnyddio’r map Google isod lle mae pin yn nodi’r lleoliad.

Mae Mainc Lifio filltir i'r gorllewin o Lanrwst.

Cymerwch y B5106 o Lanrwst tuag at Fetws-y-coed.

Ar ôl troi i'r chwith wrth yr arwydd brown a gwyn ar gyfer Castell Gwydir, trowch i'r dde yn syth i ddilyn isffordd.

Cymerwch y ffordd goedwig gyntaf ar y chwith gyda’r arwydd Mainc Lifio/Sawbench.

Y cyfeirnod grid Arolwg Ordnans ar gyfer y maes parcio yw SH 789 609 (Explorer Map OL 17).

Y cod post yw LL26 0PN. Sylwer bod y cod post hwn yn cwmpasu ardal eang ac ni fydd yn mynd â chi yn uniongyrchol i’r fynedfa.

Edrychwch ar y lle hwn ar wefan What3Words.

Cludiant cyhoeddus

Y prif orsaf reilffordd agosaf yw Llanrwst.

Er mwyn cael manylion ynghylch cludiant cyhoeddus, ewch i wefan Traveline Cymru.

Parcio

Mae’r maes parcio yn rhad ac am ddim.

Ni chaniateir parcio dros nos.

Manylion cyswllt

Nid oes staff yn y lleoliad hwn.

Cysylltwch â’n tîm cwsmeriaid gydag unrhyw ymholiadau cyffredinol yn ystod oriau swyddfa o ddydd Llun i ddydd Gwener.

Lawrlwythiadau