Coedwig Beddgelert, ger Beddgelert
Coedwig enfawr yng nghanol Parc Cenedlaethol Eryri
Coedwig Cwrt, ger Dolgellau
Beth sydd yma
Efallai y byddwn yn cau'r maes parcio a chyfleusterau eraill ar fyr rybudd wrth i ni wneud gwaith adfer oherwydd difrod yn sgil stormydd diweddar. Dylech bob amser ddilyn unrhyw gyfarwyddiadau a roddir gan arwyddion neu staff lleol, gan gynnwys lle mae llwybrau wedi eu dargyfeirio neu eu cau, a byddwch yn wyliadwrus o'r perygl o goed neu ganghennau sy’n cwympo.
Croeso
Mae Coedwig Cwrt ar gyrion Gwarchodfa Natur Genedlaethol y Rhinog.
Mae dau lwybr cerdded wedi’u harwyddo o faes parcio’r goedwig.
Mae’r ddau lwybr cerdded yn arwain i raeadr Pistyll Gwyn, ac mae’r llwybr hirach hefyd yn cynnig blas o wylltir y Rhinog.
Mae'r mynediad i’r maes parcio ar hyd is-ffordd â chlwyd oddi ar yr A470, ac mae’r troad i’r is-ffordd hon ar ran syth a chyflym o’r A470- darllenwch yr adran “sut i gyrraedd yma” yn ofalus cyn cychwyn.
Llwybrau cerdded
Mae arwyddbyst ar y llwybrau cerdded o’r dechrau i’r diwedd.
Chwiliwch am y panel gwybodaeth ar ddechrau’r llwybr.
Dysgwch beth yw ystyr graddau’r llwybrau cerdded.
Cylchdaith Coed Graigddu
- Gradd: Cymedrol
- Pellter: 3 milltir/4.8 cilomedr
- Amser: 2 awr
- Climb: 95 metres/312 feet
- Disgrifiad: Mae’r llwybr yn dilyn cymysgedd o lwybrau coedwig ag arwyneb da, ffyrdd a llwybrau cul ag arwyneb heb ei greu. Mae yna sawl rhes o risiau. Mae mainc ger y rhaeadr.
Mae’r llwybr yn dringo’n raddol ochr yn ochr â’r afon i fyny sawl rhes fer o risiau er mwyn cyrraedd y rhaeadr, lle cewch seibiant haeddiannol ar fainc sy’n edrych yn ôl i lawr y dyffryn.
Mae’r llwybr yn dychwelyd i’r maes parcio ar hyd ffordd goedwig.
Cylchdaith Bwlch Drws Ardudwy
- Gradd: Anodd
- Pellter: 4.2 milltir/6.7 cilomedr
- Amser: 3 awr
- Climb: 155 metres/509 feet
- Disgrifiad: Mae’r llwybr yn dilyn cymysgedd o lwybrau coedwig ag arwyneb da, ffyrdd a llwybrau cul ag arwyneb heb ei greu. Mae llaid a dŵr ar wyneb y llwybr naturiol trwy’r warchodfa, ac mae yna hefyd lawer o glogfeini yn dangos. Mae yna nifer o glwydi a grisiau. Mae mainc ger y rhaeadr.
Mae’r llwybr hwn yn mynd heibio rhaeadr Pistyll Gwyn cyn gadael y goedwig a chyrraedd Gwarchodfa Natur Genedlaethol y Rhinog.
Mae’r darn trwy’r warchodfa yn cynnig blas o wylltir y Rhinog gyda’r grug trwchus yn ysgubo heibio i’ch coesau a llawer o glogfeini yn dangos wrth i chi ddringo tuag at Fwlch Drws Ardudwy.
Gwarchodfa Natur Genedlaethol Rhinog
Mae Gwarchodfa Natur Genedlaethol Rhinog ynghanol cadwyn o fynyddoedd sy’n ymestyn o Afon Dwyryd tua’r gogledd, i’r Fawddach yn y de.
Mae’n cynnwys rhan helaeth o’r Rhinog Fawr a hanner Rhinog Fach – dau o fynyddoedd enwocaf y Rhinogydd.
Crëwyd y bylchau dyfnion trwy’r Rhinogydd – Bwlch Drws Ardudwy a Bwlch Tyddiad – gan rew Oes yr Iâ. Mae’r ‘Grisiau Rhufeinig’, sef llwybr merlod canoloesol, y tu draw i Fwlch Tyddiad. Dyma’r llwybr mwyaf poblogaidd i groesi’r Warchodfa.
Rhwng y clogwyni uchel, mae’r dirwedd yn greigiog a garw, a’r grug a llus yn tyfu’n dal. A gan fod llai o bobl yn dod yma na mynyddoedd eraill Parc Cenedlaethol Eryri, mae naws anghysbell a gwyllt i’r safle.
Oherwydd ehangder a chyflwr ardderchog y grug sy’n tyfu yma, dynodwyd y safle yn Warchodfa Biogenetig – yr unig un yng Nghymru. Mae’n rhan o rwydwaith Ewropeaidd o gynefinoedd arbennig a ddewiswyd i warchod amrywiaeth genetig yr amgylchedd naturiol.
Beth sydd i’w weld ar y Warchodfa Natur Genedlaethol
Mae’r tirlun a’r bywyd gwyllt yn amrywio yn ôl yr adeg o’r flwyddyn – cadwch olwg am y rhain:
- gwas neidr eurdorchog
- chacynen y llus
- cudyll coch, hebog tramor, y cudyll bach a’r boda tinwyn yn hela hyd y rhostir
- mwyalchen y mynydd, corhedydd y waun, a thinwen y garn yn ystod yr haf
- geifr lled-wyllt sy’n ddisgynyddion I anifeiliaid ¬fferm.
- y grug yn bor¬or hyd y mynydd ym misoedd Gor¬ennaf ac Awst
- y caineirian bach, sy’n anodd iawn i’w ddarganfod
Gwarchodfeydd Natur Cenedlaethol yng Nghymru
Mae Gwarchodfeydd Natur Cenedlaethol yn lleoedd sydd â rhai o'r enghreifftiau gorau o gynefinoedd bywyd gwyllt a nodweddion daearegol.
Mae dros 70 o Warchodfeydd Natur Cenedlaethol yng Nghymru.
Dewch o hyd i ragor o wybodaeth am Warchodfeydd Natur Cenedlaethol.
Parc Cenedlaethol Eryri
Mae Coedwig Cwrt a Gwarchodfa Natur Genedlaethol Rhinog wedi’i leoli ym Mharc Cenedlaethol Eryri.
Eryri yw’r Parc Cenedlaethol mwyaf yng Nghymru ac mae’n gartref i drefi a phentrefi hardd a’r mynydd uchaf yng Nghymru.
Awdurdod Parc Cenedlaethol Eryri sy’n gofalu amdano.
I gael mwy o wybodaeth am ymweld ag Eryri, ewch i wefan Awdurdod Parc Cenedlaethol Eryri.
Ymweld yn ddiogel
Rydyn ni eich eisiau chi i ddychwelyd adref yn ddiogel ar ôl eich ymweliad yma.
Rydych yn gyfrifol am eich diogelwch eich hun yn ogystal â diogelwch unrhyw blant ac anifeiliaid sydd gyda chi yn ystod eich ymweliad.
Sylwer:
- Llethrau a chlogwyni serth – gwisgwch esgidiau heicio a chymerwch ofal mawr.
- Tywydd cyfnewidiol – defnyddiwch fap a chwmpawd a gwisgwch neu cariwch ddillad addas, yn cynnwys dillad glaw a haenau i’ch cadw’n gynnes.
- Ystyriwch pa gyfarpar fydd ei angen – yn enwedig yn y gaeaf.
- Dŵr dwfn yn Llyn Du – cadwch draw.
Am gyngor ac awgrymiadau i'ch helpu i gynllunio'ch ymweliad, ewch i dudalen Ymweld â'n lleoedd yn ddiogel.
Newidiadau i gyfleusterau ymwelwyr
Gweler brig y dudalen we hon i gael manylion unrhyw gynlluniau i gau cyfleusterau neu unrhyw newidiadau eraill i gyfleusterau ymwelwyr yma.
Er mwyn eich diogelwch, dilynwch gyfarwyddiadau'r staff ac arwyddion bob amser gan gynnwys y rhai ar gyfer dargyfeirio neu gau llwybrau.
Mae'n bosibl y bydd angen i ni ddargyfeirio neu gau llwybrau wrth i ni wneud gwaith cynnal a chadw neu gynnal gweithrediadau eraill ac mae'n bosibl y bydd angen i ni gau cyfleusterau ymwelwyr eraill dros dro.
Mewn tywydd eithafol, mae'n bosibl y byddwn yn cau cyfleusterau ar fyr rybudd oherwydd y risg o anafiadau i ymwelwyr a staff.
Trefnu digwyddiad ar ein tir
Efallai y bydd angen caniatâd gennym ni i drefnu digwyddiad neu gynnal rhai gweithgareddau ar ein tir.
Gwiriwch a gewch chi ddefnyddio tir rydyn ni’n ei reoli.
Sut i gyrraedd yma
Rydym yn argymell eich bod yn dilyn y cyfarwyddiadau hyn neu’n defnyddio’r map Google isod lle mae pin yn nodi’r lleoliad.
Mae Coedwig Cwrt 11 milltir i’r gogledd o Ddolgellau.
Cymerwch yr A470 i’r gogledd o Ddolgellau i gyfeiriad Porthmadog a pharhewch heibio’r troad i Ganolfan Ymwelwyr Coed y Brenin.
Ar ôl mynd heibio’r troad i’r ganolfan ymwelwyr, parhewch ar yr A470 am ddwy filltir arall.
Yna trowch i’r chwith i’r is-ffordd – gweler y llun isod o’r troad o’r A470 i’r is-ffordd.
Mae clwyd ar yr is-ffordd y bydd angen i chi ei hagor os ydyw ar gau. Gadewch y glwyd fel y daethoch o hyd iddi.
Dilynwch yr is-ffordd am ddwy filltir nes cyrraedd y maes parcio.
Sylwer:
- Mae’r troad o’r A470 i’r is-ffordd i gyrraedd y maes parcio ar ran syth a chyflym iawn o’r ffordd.
- Ychydig o nodweddion amlwg sydd ger y troad, heblaw am arwydd llwybr ceffyl a wal gerrig fechan gyferbyn ag ef.
- Fe’ch cynghorir chi i osod eich odomedr wrth basio’r troad i Ganolfan Ymwelwyr Coed y Brenin fel eich bod yn gwybod pryd rydych yn agosáu at y troad i’r is-ffordd.
Y cyfeirnod grid Arolwg Ordnans ar gyfer y maes parcio yw SH 684 302 (Explorer Map OL 18).
Y cod post yw LL41 4YE. Sylwer bod y cod post hwn yn cwmpasu ardal eang ac ni fydd yn mynd â chi yn uniongyrchol i’r fynedfa.
Edrychwch ar y lle hwn ar wefan What3Words.
Cludiant cyhoeddus
Y prif orsafoedd rheilffordd agosaf yw'r Bermo (llinell Arfordir Cambria) a Blaenau Ffestiniog (llinell Blaenau Ffestiniog-Llandudno).
Er mwyn cael manylion ynghylch cludiant cyhoeddus, ewch i wefan Traveline Cymru.
Parcio
Mae’r maes parcio yn rhad ac am ddim.
Ni chaniateir parcio dros nos.
Manylion cyswllt
Nid oes staff yn y lleoliad hwn.
Cysylltwch â’n tîm cwsmeriaid gydag unrhyw ymholiadau cyffredinol yn ystod oriau swyddfa o ddydd Llun i ddydd Gwener.
Lawrlwythiadau dogfennau cysylltiedig
Gwybodaeth am safle Coedwig Cwrt a Rhinog
PDF [1.2 MB]
Mannau eraill yng Gogledd Orllewin Cymru
Diweddarwyd ddiwethaf