Coetir Cymunedol Coed y Bont, ger Tregaron

Coetir bach gyda chyfleusterau i ymwelwyr y gall pawb eu mwynhau

Beth sydd yma

Diweddariad coronafeirws

 

Mae ein safleoedd a’r rhan helaeth o’n cyfleusterau i ymwelwyr ar agor ond, o dan y cyfyngiadau coronafeirws presennol yng Nghymru, bwriedir i’r rhain gael eu defnyddio gan bobl sy’n byw yn lleol yn unig.

 

Fe’ch cynghorir – yn unol â rheoliadau Llywodraeth Cymru – i beidio â gyrru i unrhyw un o’n safleoedd i wneud ymarfer corff, oni bai fod gennych reswm dilys, megis cyflwr iechyd neu broblemau symudedd.

 

Rydym wedi newid ychydig ar rai o’n llwybrau arferol er mwyn eich helpu i allu cadw at ymbellhau cymdeithasol - dilynwch arwyddion ar y safle.

 

Croeso

Mae Coed y Bont yn goetir cymunedol wedi’i leoli ar gyrion pentref Pontrhydfendigaid.

Mae’n cynnwys dwy goedwig gyffiniol, Coed Dolgoed a Choed Cnwch.

Mae Coed Dolgoed yn goetir isel, fflat, yn llawn o goed llydanddail brodorol, yn bennaf helyg a bedw llwyd gyda chriafol, cyll, aethnenni a derw.

Mae Coed Cnwch yn goetir hynafol wedi’i leoli ar y llethr cyfagos, yn cynnwys hen goed derw ac ardaloedd o goed cyll a rhai coed conwydd.

Mae amrywiaeth o gyfleusterau ar gael i ymwelwyr yng Nghoed y Bont, gan gynnwys dau lwybr cerdded trwy Goed Dolgoed sy’n wastad ac yn hygyrch.

Cymdeithas Coetir Cymunedol

Mae Cymdeithas Coetir Cymunedol Coed y Bont yn helpu i ofalu am y coetiroedd, mewn partneriaeth gyda Cyfoeth Naturiol Cymru, o fewn termau’r cytundeb rheoli.

Mae gwirfoddolwyr o’r gymdeithas yn ymgymryd â nifer o dasgau cynnal a chadw, megis adnewyddu a gwella llwybrau, gosod seddi a chadw’r llystyfiant dan reolaeth.

Mae eu gwaith wedi arwain at gynnydd yn yr amrywiaeth o gynefinoedd a rhywogaethau sydd yma, ynghyd â gwella mynediad i’r coetir i bobl leol ac ymwelwyr.

Mae’r gymdeithas hefyd yn trefnu digwyddiadau yn y coetir gan gynnwys diwrnodau cadwraeth a theithiau cerdded tymhorol wedi’u harwain.

Ewch i dudalen Facebook Coed y Bont.

Cyfleusterau i ymwelwyr

Mae’r gymdeithas gymunedol wedi datblygu amrywiaeth o gyfleusterau ar gyfer pobl leol ac ymwelwyr.

Mae’r rhain yn cynnwys:

  • llwybrau cerdded (gweler isod)
  • meinciau ar hyd y llwybrau trwy Goed Dolgoed, gyda rhai wedi’u lleoli o amgylch y pwll
  • mainc ar ben Coed Cnwch gyda golygfeydd da
  • pyst adnabod bywyd gwyllt gyda gwybodaeth am ychydig o’r rhywogaethau sydd yma
  • llwybr geocache (am fwy o wybodaeth, ewch i wefan Geocaching)
  • ardal bicnic a chysgodfan bren ger y maes parcio
  • byrddau gwybodaeth yn y maes parcio

Cyfleusterau i ymwelwyr

Llwybrau cerdded

Mae dau lwybr coed wedi’u creu’n bwrpasol yng nghoetir is a gwastad Coed Dolgoed.

Mae’r ddau lwybr yn addas ar gyfer cadeiriau olwyn a chadeiriau gwthio.

Llwybr Coed Aethnen

  • Gradd: hawdd
  • Pellter: ¼ milltir/0.4 cilomedr

Mae’r llwybr byr hwn yn eich arwain drwy goetir ifanc ac yn mynd heibio pwll lle ceir ynys fechan.

Mae’r pwll yn sychu yn yr haf ond mae’n rhywle tawel lle gallwch eistedd ar un o’r meinciau.

Chwiliwch am yr aethnenni ‘crynedig’ – a’u dail sy’n ysgwyd yn yr awel ac yn troi’n aur yn yr hydref.

Llwybr Coed Bedw

  • Gradd: hawdd
  • Pellter: ½ milltir/0.9 cilomedr

Beth am grwydro’n hamddenol drwy’r coed bedw a dilyn y llwybr sy’n mynd rhwng y ddau bwll bychan.

Mae hon yn rhan gorslyd iawn o’r coetir felly chwiliwch am weision y neidr ddiwedd yr haf.

Mae’r llwybr yn dychwelyd i’r man cychwyn ar hyd ffordd y goedwig o ble ceir golygfeydd o Ben-y-Bannau, bryn trawiadol tua’r gogledd.

Teulu yn cerdded mewn goedwig

Llwybrau troed eraill

Mae rhwydwaith o lwybrau mwy garw a mwy serth trwy goetir hynafol Coed Cnwch, sydd wedi’i leoli ar lethr y bryn.

Abaty Ystrad Fflur

Roedd coetiroedd Coed y Bont unwaith o fewn tiroedd abaty Sistersaidd Ystrad Fflur, un o’r abatai mwyaf ym Mhrydain.

Mae Coed y Bont ar Lwybr Ystrad Fflur ac mae byrddau gwybodaeth am hanes yr abaty yn y maes parcio.

Mae adfeilion yr Abaty gerllaw, ac maent ar agor i’r cyhoedd.

Am fwy o wybodaeth, ewch i wefan Cadw.

Bywyd gwyllt 

Pwll

Mae cofnod o lygod pengrwn y dŵr ac iyrchod yng Nghoed y Bont, ac mae’r pryfaid niferus yn bwydo nifer o adar sy’n bridio.

Mae oddeutu 80 o wahanol rywogaethau o adar wedi’u gweld neu’u clywed yn y coetir gan gynnwys y titw tomos las, titw mawr, delor y cnau, gwybedog brith, gwybedog mannog, tingoch, titw’r wern a’r dylluan frech. Mae’r barcud coch yn nythu yma.

Mae’r coed collddail a’r pyllau yng Nghoed Dolgoed yn ffefryn gan loÿnnod byw, gwyfynod a gweision neidr.

Mae coetir hynafol Coed Cnwch ar y llethr yn cynnwys coed derw a choed cyll sydd ganrifoedd oed, ynghyd ag ardaloedd gwlypach o goed bedw a gwern.

Mae’r brithwaith o goed aeddfed yn llawn cennau a ffyngau, gan gynnwys y menyg cyll prin, ac mae’r coetir yn ofnadwy o brydferth yn y gwanwyn, wedi’i orchuddio â charped o glychau’r gog.

Mae peth darnau o larwydd a ffynidwydden Douglas yn parhau i fod yma ers i’r Comisiwn Coedwigaeth eu plannu yn y 1970au. Bydd y coed conwydd yn cael eu gwaredu’n raddol, fel rhan o raglen i adfer coetir hynafol. 

Safle Darganfod Awyr Dywyll

Coed y Bont yn y nos gan Dafydd Wyn Morgan

Mae Coed y Bont wedi’i leoli ym Mynyddoedd Cambria, lle mae’r awyr dros nos ymhlith y rhai mwyaf tywyll yn Ewrop.

Coed y Bont yw un o’r lleoedd gorau yn lleol i weld y sêr ac mae wedi’i ddynodi’n Safle Darganfod Awyr Dywyll.

Mae Safleoedd Darganfod Awyr Dywyll:

  • i ffwrdd o’r gwaethaf o unrhyw lygredd golau lleol
  • yn fannau lle gellir gweld yr awyr yn glir
  • yn hygyrch i’r cyhoedd, gan gynnwys daear gadarn i gadeiriau olwyn, ac yn gyffredinol gellir mynd atynt drwy’r amser.

Darllenwch syniadau ynglŷn â rhyfeddu at yr awyr yn y nos ar wefan Partneriaeth Darganfod Awyr Dywyll y DU

Gwybodaeth mynediad

Mainc ar y llwybr

Mae’r llwybrau o amgylch y coetir is (Coed Dolgoed) yn llwybrau mynediad hawdd sy’n addas ar gyfer cadeiriau olwyn a chadeiriau gwthio.

Mae nifer o feinciau ar hyd y llwybrau.

Sut i gyrraedd yma

Lleoliad

Mae coetir cymunedol Coed y Bont 6 milltir i’r gogledd o Dregaron.

Mae yn Sir Ceredigion.

Map Arolwg Ordnans

Mae Coed y Bont ar fap Arolwg Ordnans (A0) 187.

Cyfeirnod grid yr AO yw SN 737 659.

Cyfarwyddiadau

Dilynwch y B4343 o Dregaron tuag at Bontrhydfendigaid.

Ar ôl cyrraedd Pontrhydfendigaid, trowch i’r dde ar Ffordd yr Abaty, gan ddilyn yr arwydd brown a gwyn ar gyfer Abaty Ystrad Fflur.

Ar ôl hanner milltir, mae maes parcio Coed y Bont ar y dde.

Trafnidiaeth gyhoeddus

Y prif orsaf rheilffyrdd agosaf yw Aberystwyth.

Mae gwasanaeth bws yn rhedeg i Bontrhydfendigaid

Am fanylion trafnidiaeth gyhoeddus, ewch i wefan Traveline Cymru.

Maes parcio

Mae parcio’n ddi-dâl.

Cau a dargyfeirio

  • Weithiau bydd angen inni gau neu ddargyfeirio llwybrau er mwyn eich diogelwch chi tra byddwn yn gwneud gwaith cynnal a chadw neu weithgareddau eraill.
  • Efallai y bydd yn rhaid inni gau safle yn ystod tywydd eithafol, megis gwyntoedd cryfion neu rew ac eira, oherwydd y risg o anafiadau i ymwelwyr neu staff.
  • Dylech bob amser ddilyn unrhyw gyfarwyddiadau ar y safle ac unrhyw arwyddion dargyfeirio dros dro.

Manylion cyswllt

Cyfoeth Naturiol Cymru

0300 065 3000

enquiries@naturalresourceswales.gov.uk

Cymdeithas Gymunedol Coetir Coed y Bont

Tudalen Facebook Cymdeithas Gymunedol Coetir Coed y Bont

Gwefan Cymdeithas Gymunedol Coetir Coed y Bont

Mannau eraill yng Canolbarth Cymru