Cyfoeth Naturiol Cymru yn cyhoeddi ymgynghoriad ar Barc Cenedlaethol newydd

Cynhelir cyfnod ymgynghori cyhoeddus o 10 wythnos ar gynigion ar gyfer Parc Cenedlaethol newydd yng Nghymru rhwng 7 Hydref ac 16 Rhagfyr 2024, yn ôl cyhoeddiad heddiw (Dydd Llun 23 Medi) gan Cyfoeth Naturiol Cymru (CNC).

Mae Llywodraeth Cymru wedi comisiynu CNC i asesu’r dystiolaeth a’r achos dros gael Parc Cenedlaethol newydd ac i wneud argymhelliad.

Cafodd ardal astudiaeth (y cyfeirir ati fel yr Ardal Chwilio), sy’n seiliedig ar ‘Dirwedd Genedlaethol’ Bryniau Clwyd a Dyffryn Dyfrdwy ei nodi a’i rhannu yn ystod cyfnod ymgysylltu â’r cyhoedd ar ddiwedd 2023. Yn dilyn hyn, a chyfnod o gasglu tystiolaeth, bydd CNC nawr yn ymgynghori â’r cyhoedd ar y cynnig sy’n dod i’r amlwg drwy gydol misoedd yr hydref a’r gaeaf.

Bydd y digwyddiadau ymgynghori cyhoeddus yn gyfle i ddysgu mwy am y prosiect a’r dystiolaeth a gasglwyd hyd yma, i ofyn cwestiynau i’r tîm a rhannu adborth ar y map ffiniau drafft y cyfeirir ato fel Map yr Ardal Ymgeisiol.

Meddai Ash Pearce, Rheolwr Rhaglen yn nhîm Rhaglen Tirweddau Dynodedig CNC:

Er bod gennym weithdrefn statudol i’w dilyn, rydym eisiau sicrhau fod hon yn broses gynhwysol a bod pobl yn cael cyfle i rannu eu barn ar y cynigion.

Mae ymgysylltu cynnar wedi rhoi darlun llawer cliriach i ni o broblemau, gobeithion a phryderon y bobl leol a rhanddeiliaid. Rydym wedi nodi un ar ddeg o themâu sy'n tanlinellu risgiau a chyfleoedd i'r ardal. Mae'r rhain yn adlewyrchu pryderon am dwristiaeth a'r effaith ar dai, ond hefyd y gobeithion am well rheolaeth, mynediad cyfrifol, cadwraeth ac adferiad byd natur.

Os caiff Parc Cenedlaethol newydd ei sefydlu, yna mae’n rhaid iddo allu rheoli’r risgiau a manteisio ar y cyfleoedd sydd ar gael, er mwyn gwella byd natur, pobl a chymunedau.”

Rydym wedi diwygio ardal yr astudiaeth mewn ymateb i adborth lleol ac yn ystod y flwyddyn ddiwethaf, rydym wedi penodi tri ymgynghorydd annibynnol ar wahân i’n helpu i ddatblygu’r dystiolaeth a fydd yn llywio ein hargymhelliad. O ganlyniad i'r gwaith hwn, mae gennym bellach fap Ardal Ymgeisiol yr hoffem ei rannu â'r cyhoedd. Rydym yn annog unrhyw un sydd â diddordeb i fynychu un o’r digwyddiadau a restrir isod a chwblhau ein holiadur ar ôl gweld y crynodeb o’r dystiolaeth.

Mae pobl yn cael eu hannog i alw heibio i ddigwyddiad wyneb yn wyneb neu anfon e-bost at dîm y prosiect yn rhaglen.tirweddau.dynodedig@cyfoethnaturiolcymru.gov.uk er mwyn cofrestru ar gyfer digwyddiad ar-lein. Dim ond un digwyddiad fydd angen i bobl fynd iddo gan y bydd yr wybodaeth a rennir yr un fath ar gyfer pob digwyddiad.

Digwyddiadau galw heibio cyhoeddus

Digwyddiadau cyhoeddus ar-lein

Digwyddiadau grŵp wedi'u targedu

I gael gwybod mwy ewch i wefan ein prosiect. Bydd yr holl adnoddau ymgynghori ar gael ar wefan y prosiect o 7 Hydref 2024 ymlaen.