Penderfyniad rheoleiddio 059: Gwaredu coed a phlanhigion y mae afiechyd neu blâu yn effeithio arnynt

Mae'r penderfyniad rheoleiddiol hwn yn ddilys tan 1 Mehefin 2025, a bydd wedi cael ei adolygu erbyn hynny. Dylech wirio gyda ni bryd hynny i sicrhau bod y penderfyniad rheoleiddiol yn dal i fod yn ddilys.

Gall CNC dynnu’r penderfyniad rheoleiddiol hwn yn ôl neu ei ddiwygio cyn y dyddiad adolygu os ydym o’r farn bod hynny’n angenrheidiol. Mae hyn yn cynnwys pan nad yw'r gweithgareddau y mae'r penderfyniad rheoleiddiol hwn yn ymwneud â hwy wedi newid.

Penderfyniad rheoleiddiol

Os ydych yn cydymffurfio â’r amodau yn y penderfyniad rheoleiddiol hwn, cewch wneud y canlynol:

• llosgi yn yr awyr agored goed a phlanhigion y mae afiechyd neu blâu yn effeithio arnynt, o dan Hysbysiad Iechyd Planhigion
• mynd y tu hwnt i’r terfynau llosgi a storio yn yr esemptiad gwastraff: D7 llosgi gwastraff yn yr awyr agored (Saesneg yn unig)

Os na fedrwch gydymffurfio â'r amodau yn y penderfyniad rheoleiddiol hwn, mae angen i chi wneud cais am drwydded amgylcheddol.

Yr amodau y mae’n rhaid i chi gydymffurfio â nhw

Rhaid i chi fodloni'r amodau hyn i gydymffurfio â'r penderfyniad rheoleiddiol hwn.

Rhaid i chi wneud y canlynol:

• feddu ar hysbysiad iechyd planhigion a chydymffurfio ag ef, sy’n ei gwneud yn ofynnol i chi ddileu clefydau a phlâu – rhaid i chi gydymffurfio â’r gofynion yn yr hysbysiad hwnnw 
• cofrestru esemptiad gwastraff D7 i losgi meinwe planhigion a gwastraff pren heb ei drin yn yr awyr agored

Rhaid i chi gydymffurfio â’r holl amodau yn esemptiad gwastraff D7 ac eithrio, er mwyn cydymffurfio â’r hysbysiad iechyd planhigion, cewch wneud y canlynol:

• llosgi mwy na 10 tunnell o wastraff mewn unrhyw gyfnod o 24 awr
• storio mwy nag 20 tunnell o wastraff ar unrhyw adeg
  
  

Gorfodi

Nid yw'r penderfyniad rheoleiddiol hwn yn newid y gofyniad cyfreithiol i chi gael trwydded amgylcheddol ar gyfer gweithrediad gwastraff pan ydych yn gwaredu coed a phlanhigion y mae afiechyd neu blâu yn effeithio arnynt.

Fodd bynnag, ni fydd CNC fel arfer yn cymryd camau gorfodi os nad ydych yn cydymffurfio â’r angen i gael trwydded amgylcheddol os ydych yn bodloni’r gofynion yn y penderfyniad rheoleiddiol hwn.

Yn ogystal, ni chaiiff eich gweithgaredd achosi (na bod yn debygol o achosi) llygredd i’r amgylchedd na niweidio iechyd pobl, ac ni chaniateir iddo:

• beri risg i ddŵr, aer, pridd, planhigion nac anifeiliaid
• peri niwsans drwy sŵn neu arogleuon
• cael effaith andwyol ar gefn gwlad neu leoedd o ddiddordeb arbennig