Hepgoriadau tâl ar gyfer trwyddedu rhywogaethau
Mae ein cynllun codi tâl ar gyfer trwyddedu rhywogaethau yn cynnwys pedwar hepgoriad tâl. Byddwn yn parhau i ariannu'r pedwar hepgoriad tâl drwy gymorth grant.
Er mwyn i unrhyw un o’r hepgoriadau fod yn berthnasol i’ch cais, efallai y gofynnir i chi ddarparu tystiolaeth addas i gefnogi hyn.
Bydd hepgoriadau ond yn gymwys lle mae’r cynnig yn bodloni prif amcan yr hepgoriad yn ein barn ni.
Ni fyddwn yn codi tâl am drwydded rhywogaeth sy’n dod o dan un neu fwy o’r hepgoriadau hyn:
Hepgoriad A – cadwraeth, gwyddonol, ymchwil neu addysg
Ni fyddwn yn codi tâl am gais ar gyfer trwydded rhywogaeth os ydych yn gwneud gwaith arolygu nid er elw nac am geisiadau gan asiantaethau gorfodi fel yr heddlu, y mae angen trwydded arnynt i ymchwilio i drosedd a amheuir. Ni fydd ffi yn gymwys os mai'r prif amcan, yn ein barn ni, yw:
- cadwraeth y rhywogaeth warchodedig honno neu ei chynefinoedd
- hybu dealltwriaeth wyddonol o rywogaethau a warchodir neu eu cynefinoedd
- addysg yn ymwneud â'r rhywogaeth warchodedig honno neu ei chynefinoedd
- cynnal neu wella bioamrywiaeth neu gydnerthedd ecosystemau
- cynnal a chadw neu warchod henebion cofrestredig
Hepgoriad B – diogelwch y cyhoedd, iechyd y cyhoedd, neu atal difrod difrifol i eiddo
Byddwn yn hepgor taliadau lle mai'r prif amcan, yn ein barn ni, yw:
- cynnal diogelwch y cyhoedd rhag anaf neu farwolaeth uniongyrchol
- gwarchod iechyd y cyhoedd rhag bygythiad uniongyrchol
- atal clefydau rhag lledaenu
- gwarchod adar gwyllt
- atal difrod difrifol i dda byw, porthiant ar gyfer da byw, cnydau, llysiau, ffrwythau, pren sy'n tyfu, pysgodfeydd neu ddŵr mewndirol
- gwarchod diogelwch aer, neu
- warchod fflora a ffawna.
Hepgoriad C – trwyddedau yn ymwneud â rheoli rhywogaethau estron goresgynnol
Ni fydd ffi yn berthnasol i unrhyw drwydded a roddir o dan Ran 8 o Orchymyn Rhywogaethau Estron Goresgynnol (Gorfodi a Thrwyddedu) 2019.
Hepgoriad D – datblygiadau cartref a datblygiadau i ddarparu cyfleusterau a mynediad i bobl anabl
Ni fydd unrhyw ffi yn berthnasol i gais os ydych yn gwneud gwaith datblygu cartref cyfreithlon, fel y’i diffinnir yn Erthygl 2 o Orchymyn Cynllunio Gwlad a Thref (Gweithdrefn Rheoli Datblygu) 2012.
Yn ogystal, ni fydd unrhyw ffi yn berthnasol i drwydded ar gyfer trwydded rhywogaeth sy’n angenrheidiol i weithredu datblygiad (p’un a yw’n ddatblygiad cartref ai peidio) y mae’r awdurdod cynllunio lleol perthnasol wedi’i dderbyn fel un sy’n dod o dan yr eithriad yn Rheoliad 4 o Reoliadau Cynllunio Gwlad a Thref (Ffioedd am Geisiadau, Ceisiadau Tybiedig ac Ymweliadau Safle) (Cymru) 2015.