Cyfranogiad y cyhoedd: sut y gallwch gymryd rhan yn ein hymgynghoriadau ar drwyddedau

Pam a phryd rydym yn ymgynghori

Ein diben yw sicrhau bod adnoddau naturiol Cymru'n cael eu rheoli, eu gwella a'u defnyddio’n gynaliadwy, yn awr ac yn y dyfodol. Mae ein cyfrifoldebau presennol yn rhoi cyswllt uniongyrchol i ni â thua 1,700 o safleoedd diwydiannol, gwastraff a dŵr ledled Cymru. Rydym hefyd yn rhoi dros 10,000 o drwyddedau, 65,000 o drwyddedau pysgota â gwialen, 480 o drwyddedau cwympo coed a 100 o drwyddedau morol bob blwyddyn.

Mae'r Datganiad Cyfranogiad y Cyhoedd hwn yn canolbwyntio ar y prif dimau o fewn y gwasanaeth trwyddedu sy’n cynnal ymgynghoriadau fel rhan o'u proses o wneud penderfyniadau. Nid yw'n ymdrin â'r holl weithgareddau trwyddedu a chaniatâd y mae CNC yn eu cynnal, er enghraifft, nid yw'n cynnwys caniatâd Safle o Ddiddordeb Gwyddonol Arbennig (SoDdGA), esemptiadau na thrwyddedau pysgota â gwialen.

Mae ein rôl reoliadol wedi'i sefydlu drwy gymysgedd o Gyfarwyddebau Ewropeaidd a deddfwriaethau a pholisïau'r DU sy'n nodi’r mathau o weithgareddau rydym yn eu rheoleiddio, ac sy'n ei gwneud yn ofynnol i ni gyflawni dyletswyddau penodol fel rhoi trwyddedau, gwirio cydymffurfedd a chyflawni gwaith monitro. Rydym yn ymgynghori ar geisiadau penodol er mwyn cydymffurfio â gofynion y ddeddfwriaeth amgylcheddol berthnasol ac ar unrhyw geisiadau y mae’n briodol i ni gynnal ymgynghoriad arnynt yn ein barn ni, p'un a oes gofyniad cyfreithiol i ymgynghori ai peidio.

Mae'n ofynnol yn gyfreithiol i ni ymgynghori ar geisiadau am drwyddedau pwrpasol newydd ar gyfer y canlynol:

gosodiadau
cyfleusterau gwastraff (a'r rheiny sy'n cynnwys gwastraff o weithgareddau mwyngloddio)
ansawdd dŵr
adnoddau dŵr (sylwer: Rydym yn meddu ar y pŵer i atal gofynion ymgynghori ar gyfer rhai ceisiadau)
gweithgareddau sy'n ymwneud â sylweddau ymbelydrol (heblaw am ffynonellau wedi'u selio)
gweithgareddau gweithfeydd hylosgi canolig / generaduron penodol (dim ond pan fyddwn o'r farn y gall gweithrediad y cyfleuster rheoleiddiedig gael effeithiau negyddol sylweddol ar fodau dynol neu'r amgylchedd)
ceisiadau amrywiad sylweddol (gosodiadau yn unig)
ceisiadau am drwyddedau morol (ac eithrio ceisiadau band 1)

Nid yw'n ofynnol yn gyfreithiol i ni gynnal ymgynghoriad fel rhan o'r broses o wneud penderfyniadau ar gyfer y canlynol:

trwyddedau gweithgarwch perygl llifogydd
trwyddedau ar gyfer rhywogaethau
ceisiadau am drwyddedau morol band 1

Fodd bynnag, mae'n bosibl y byddwn yn ymgynghori ar geisiadau ar gyfer y trefniadau hyn os teimlwn y gallent fod o ddiddordeb mawr gan y cyhoedd.

Nid ydym ychwaith yn ymgynghori ar geisiadau ar gyfer trwyddedau rheolau safonol nac unrhyw rannau o gais sy'n gyfrinachol yn fasnachol neu sy'n manylu ar reolaethau diogelwch gwladol.

Nid yw'n ofynnol yn gyfreithiol i ni gynnal ymgynghoriadau fel rhan o'r broses o wneud penderfyniadau ar gyfer ceisiadau am drwydded cwympo coed ac wrth i ni ddod i'n penderfyniad o ran a oes angen asesiad o’r effaith amgylcheddol ar brosiect. Fodd bynnag, rydym yn cyhoeddi ceisiadau ar gyfer y trefniadau hyn.

Sut rydym yn gwneud ein penderfyniadau

Mae ein penderfyniadau ynghylch p'un a ddylid rhoi neu wrthod trwydded yn cael eu diffinio gan ofynion cyfreithiol. Mae'n ofynnol i ni gyfiawnhau ein penderfyniad o fewn terfynau cyfyngiadau'r gyfraith.

Mae ein trwyddedau a'n caniatadau'n cynnwys amodau sy'n gwarchod yr amgylchedd a phobl. Rydym yn gosod cyfyngiadau a therfynau ar weithgareddau y mae angen i ni eu rheoli a, lle y bo angen, rydym yn gofyn bod allyriadau aer, dŵr a thir yn cael eu monitro. Rydym yn ystyried amrywiaeth o faterion gan gynnwys, er enghraifft, unrhyw effaith bosibl ar lywio a'r effaith bosibl o ddefnydd dilys o’r môr ar gyfer trwyddedu morol, effeithiau ar berygl llifogydd a draenio ar gyfer trwyddedau gweithgarwch perygl llifogydd a diogelu safleoedd gorffwys a bridio rhag aflonyddwch, difrod a difetha ar gyfer trwyddedau rhywogaethau.

Yn gyfreithiol, rhaid i ni roi trwydded os gall yr ymgeisydd ddangos y bydd yr holl ofynion cyfreithiol yn cael eu bodloni. Ni allwn wrthod cais yn gyfreithiol oherwydd gwrthwynebiad lleol i'r gweithgarwch yn unig.

A yw trwyddedau'r un peth â chaniatâd cynllunio?

Mae ein gwaith a'n penderfyniadau yn cael eu hystyried ar wahân i'r broses gynllunio. Maent yn ymddangos yn debyg i ganiatâd cynllunio mewn rhai agweddau ond maent yn brosesau a chaniatadau ar wahân ac annibynnol.

Yn aml, bydd angen i ymgeiswyr gael trwydded gennym ni a chaniatâd cynllunio gan yr awdurdod lleol i weithredu (ac efallai y bydd yr awdurdod lleol yn cysylltu â ni fel ymgynghorai), ond gellir gwneud cais am bob un a'i rhoi heb y llall ac nid yw cael un drwydded o reidrwydd yn golygu y bydd y llall hefyd yn cael ei rhoi, ac eithrio trwyddedu rhywogaethau lle mae'n rhaid rhoi caniatâd cynllunio cyn gwneud cais am drwydded.

Rôl trwyddedu

Trwyddedu amgylcheddol gan gynnwys trwyddedau gweithgarwch perygl llifogydd

Mae ein penderfyniadau ynghylch trwyddedu'n ystyried cynllun a gweithrediad y prosesau er mwyn atal llygredd a lleihau'r effaith ar yr amgylchedd ac iechyd dynol.

Hefyd, rhaid i'n penderfyniadau trwyddedu gweithgareddau perygl llifogydd reoli perygl llifogydd ac effeithiau draenio yn ogystal â'r uchod.

Ceisiadau coedwigaeth

Mae gofyn i'n penderfyniadau o ran rhoi trwyddedau coedwigaeth warchod yr amgylchedd a sicrhau bod yr adnoddau coedwig yng Nghymru yn cael eu rheoli’n gynaliadwy ac yn unol ag egwyddorion Safon Coedwigaeth y DU.

Adnoddau dŵr

Mae gofyn i'n penderfyniadau o ran rhoi trwyddedau adnoddau dŵr ystyried y sawl sy’n defnyddio dŵr yn gyfreithlon, hawliau gwarchodedig a'r amgylchedd.

Trwyddedu morol

Mae gofyn i'n penderfyniadau o ran rhoi trwyddedau morol ystyried yr angen i warchod yr amgylchedd, iechyd dynol ac atal ymyrraeth â defnyddiau dilys o’r môr.

Trwyddedu rhywogaethau

Ar gyfer ceisiadau a dderbynnir o dan Reoliadau Gwarchod Cynefinoedd a Rhywogaethau 2017, rhaid inni ystyried y pwrpas, e.e. rhesymau hanfodol sef er budd cyhoeddus tra phwysig, a oes unrhyw opsiynau boddhaol eraill; a phe bai camau gweithredu'n cael eu hawdurdodi, na fydd yn niweidiol i'r gwaith o gynnal poblogaeth y rhywogaeth dan sylw ar statws cadwraeth ffafriol yn eu hystod naturiol.

Ar gyfer ceisiadau a dderbynnir o dan y ddeddfwriaeth arall rydym yn eu trwyddedu, e.e. Deddf Bywyd Gwyllt a Chefn Gwlad 1981 (fel y'i diwygiwyd), rhaid i ni sicrhau bod y diben yn bodloni'r meini prawf o fewn y ddeddfwriaeth berthnasol a phe bai camau gweithredu'n cael eu hawdurdodi, na fydd yn cael effaith niweidiol ar statws poblogaeth y rhywogaeth dan sylw.

Ar gyfer ceisiadau o dan Orchymyn Rhywogaethau Goresgynnol Estron 2019, rhaid i ni sicrhau bod y diben yn bodloni'r meini prawf penodedig o fewn y ddeddfwriaeth berthnasol.

Ein cylch gwaith rheoliadol

Rydym yn aml yn derbyn sylwadau ar faterion nad ydynt o fewn ein cylch gwaith cyfreithiol. Golyga hyn na allwn ganiatáu i'r sylwadau hyn ddylanwadu ar ein penderfyniad. Isod, ceir enghreifftiau o asesiadau sydd naill ai o fewn ein cylch gwaith cyfreithiol neu y tu allan iddo. Mae ein timau i gyd yn ystyried yr effaith bosibl ar yr amgylchedd, cynefinoedd a safleoedd dynodedig, e.e. Safleoedd o Ddiddordeb Gwyddonol Arbennig mewn perthynas â chais. Fodd bynnag, sylwer ei bod yn bosibl na fydd yr enghreifftiau canlynol yn berthnasol i bob tîm, trefn neu gais.