Buddion plannu coed a chreu coetir

Mae plannu coed yn gallu cynnig buddion ar gyfer eich tir neu’r gymuned leol ac ar gyfer bywyd gwyllt a’r amgylchedd.

Nid oes rhaid i chi fod yn berchen ar fferm neu ardal eang o dir i blannu coed. Gall un goeden neu grŵp bach o goed wneud gwahaniaeth positif i’ch gweithle, cartref, ysgol neu gymuned.

Buddion coetir i’ch fferm ac i’ch busnes

Gall plannu coed gynnig buddion i’ch fferm a’ch tir gan gynnwys:

  • ynysu rhag sŵn
  • darparu preifatrwydd
  • creu cysgod ar gyfer da byw ac adeiladau
  • gwella systemau cynhyrchu da byw
  • lleihau effaith y gwynt
  • rheoli perygl llifogydd
  • lleihau eich ôl troed carbon
  • darparu cynnyrch pren fel pyst ffensio, giatiau a thanwydd
  • lleihau erydiad pridd
  • helpu i atal tir rhag mynd yn ddwrlawn

Os ydy'ch fferm hefyd yn fusnes, gall creu coetir hefyd gynnig cyfleoedd newydd trwy:

  • werthu pren, cynnyrch pren neu goed tân
  • saethu adar hela / anifeiliaid hela
  • twristiaeth ar y fferm

Mae'r Côd Carbon Coetiroedd yn safon gwirfoddol ar gyfer prosiectau creu coetir. Os gallwch ddangos eich bod yn cyrraedd y safon hwn, gallwch werthu'r carbon mae eich coetir yn ei ddal a'i storio ar ffurf Unedau Carbon Coetir. 

Buddion coetir i’ch cymuned leol

Mae coetiroedd yn gallu helpu i wella iechyd a lles. Maen nhw’n cynnig lleoliadau ar gyfer chwarae, addysg a dysgu, gweithgareddau awyr agored a gweithgareddau cymunedol. Mae prosiectau coetir cymunedol yn ffordd wych i bobl a busnesau lleol ddod at ei gilydd i greu coetir yn eu hardal leol.

Buddion coetir i fywyd gwyllt

Mae coetiroedd yn darparu cynefin cyfoethog ar gyfer planhigion ac anifeiliaid, gan gynnwys peillwyr a rhywogaethau prin.

Buddion coetir i’r amgylchedd

Uchelgais Llywodraeth Cymru yw plannu 43,000 hectar o goetir newydd erbyn 2030 a 180,000 hectar erbyn 2050 i helpu Cymru i gyflawni targedau lleihau allyriadau carbon. Mae hwn yn cyfateb i blannu o leiaf 5,000 hectar y flwyddyn. 

Mae coetiroedd yn gwella ansawdd yr amgylchedd gan eu bod yn:

  • helpu i ddiogelu ansawdd cyflenwadau dŵr yfed
  • rheoli llifogydd
  • amsugno llygryddion niweidiol a gwella ansawdd yr aer
  • cynnig cysgod ac yn amsugno sŵn
  • sefydlogi priddoedd, lleihau erydiad a thirlithriadau

Dechrau creu coetir

Er mwyn dechrau plannu coed a chreu coetir, gallwch ddarganfod mwy am baratoi ar gyfer plannu coed a choetir.

Diweddarwyd ddiwethaf