Asesu effeithiau ar ansawdd aer fel rhan o’ch cais cynllunio

Mae gan effeithiau ar ansawdd aer o ddatblygiadau arfaethedig, neu sy’n gysylltiedig â datblygiadau arfaethedig, y potensial i niweidio nodweddion pwysig safleoedd gwarchodedig. 

Mae’r cyngor hwn yn nodi pryd yr ydym yn disgwyl i chi ystyried effeithiau posibl ar safleoedd gwarchodedig fel rhan o’ch cais cynllunio, a pha wybodaeth ategol y mae ei hangen.

Mae safleoedd gwarchodedig yn cynnwys:

• Ardaloedd cadwraeth arbennig (ACA)
• Ardaloedd gwarchodaeth arbennig (AGA)
• Safleoedd Ramsar
• Safleoedd o ddiddordeb gwyddonol arbennig (SoDdGA)
• Gwarchodfeydd natur cenedlaethol
• Parthau cadwraeth morol

Pryd i ystyried effeithiau posibl ar ansawdd aer o ran safleoedd gwarchodedig

Datblygiad amaethyddol

Darganfyddwch beth i’w ddarparu gyda’ch cais cynllunio ar gyfer datblygiad amaethyddol.

Effeithiau ar ansawdd aer o ganlyniad i gynnydd mewn symudiadau traffig 

Os yw eich datblygiad arfaethedig yn cynyddu symudiadau traffig, ac y mae’r canlynol yn wir;

• Mae safleoedd gwarchodedig o fewn 200 metr i ymyl ffordd, lle bydd eich datblygiad arfaethedig yn achosi traffig ychwanegol, ac;
• Mae’r cynnydd yn y llif traffig dyddiol cyfartalog blynyddol o’r datblygiad yn fwy na 1,000 o gerbydau gwaith ysgafn neu 200 o gerbydau gwaith trwm. 

Mae potensial ar gyfer effeithiau annerbyniol ar ansawdd aer a allai effeithio ar safleoedd gwarchodedig, a bydd angen i chi baratoi asesiad ansawdd aer o’r effeithiau posibl i ategu’ch cais cynllunio.

Effeithiau ar ansawdd aer o ganlyniad i weithgareddau sy’n allyrru llwch

Os yw eich datblygiad arfaethedig yn cynnwys gweithgaredd adeiladu sy’n cynhyrchu llwch, ac mae safleoedd gwarchodedig o fewn: 

• 50 metr o ffin safle’r cais, neu;
• 50 metr o’r llwybr(au) a ddefnyddir gan gerbydau adeiladu ar y briffordd gyhoeddus, o fewn radiws o 500 metr o fynedfa / mynedfeydd safle’r cais, a / neu; 

Os yw eich datblygiad arfaethedig yn bwriadu cynnal gwaith mwyngloddio, ac y mae safleoedd gwarchodedig o fewn:

• 250 metr o safle’r cais ar gyfer safleoedd mwynau craig feddal (e.e. tywod a graean), a; 
• 400 metr o ffin safle’r cais ar gyfer safleoedd mwynau craig galed (e.e. gwenithfaen).

Mae potensial ar gyfer effeithiau annerbyniol ar ansawdd aer a allai effeithio ar safleoedd gwarchodedig, a bydd angen i chi baratoi asesiad ansawdd aer o’r effeithiau posibl i ategu’ch cais cynllunio.

Effeithiau ar ansawdd aer oherwydd gwaith gosod

Os yw eich datblygiad arfaethedig yn cynnwys math o ddatblygiad neu waith gosod sydd angen trwydded amgylcheddol ac yn dod o fewn y pellteroedd sgrinio a nodir yn y tabl isod, mae ganddo’r potensial i niweidio ansawdd aer safleoedd gwarchodedig. Mewn achosion o’r fath, dylai eich cais cynllunio gael ei ategu gan asesiad ansawdd aer. Os na fyddwch yn cynnal asesiad ansawdd aer, efallai y byddwn yn gwrthwynebu’r cais cynllunio.

Gallwch ganfod lleoliadau safleoedd gwarchodedig, mewn perthynas â’ch safle datblygu arfaethedig ar wefan Map Data Cymru.

Dysgwch fwy am weithfeydd hylosgi canolig a chynhyrchwyr penodedig.

Beth i’w gynnwys yn eich asesiad ansawdd aer

Ar ôl i chi nodi unrhyw safleoedd gwarchodedig, bydd angen i chi baratoi asesiad ansawdd aer o ran yr effeithiau posibl i ategu’ch cais cynllunio er mwyn ystyried cynnydd mewn symudiadau traffig ac unrhyw waith gosod.

Dylai eich asesiad nodi’r lefelau critigol sy’n berthnasol i’r safle a’r llwythi critigol sy’n berthnasol i’r safle, a nodweddion cymwys safleoedd gwarchodedig o fewn y pellteroedd sgrinio a nodir yn y tabl uchod.

Gallwch ddod o hyd i wybodaeth am lefelau critigol a llwythi critigol ar wefan y System Gwybodaeth Llygredd Aer (APIS).

Os nad oes gwybodaeth ar gael ar y System Gwybodaeth Llygredd Aer ar gyfer y safle gwarchodedig a nodwyd, dylech ddefnyddio’r trothwyon lefelau critigol a llwythi critigol a amlinellir yn yr asesiad o risg allyriadau aer ar gyfer eich trwydded amgylcheddol – GOV.UK, yn benodol yr adran o’r enw ‘sgrinio ar gyfer ardaloedd cadwraeth gwarchodedig’.

Er mwyn canfod a allai eich datblygiad arfaethedig gael effaith sylweddol ar safle gwarchodedig, rhaid i chi ystyried ei gyfraniad i’r broses. Nid oes angen asesiad pellach o’r effeithiau ar ansawdd aer os yw’r canlynol yn wir:

Mae cyfraniad eich datblygiad arfaethedig i’r broses yn <1% o lefel critigol a llwyth critigol y safle gwarchodedig (gellir sgrinio hyn fel cyfraniad dibwys). 

Fodd bynnag, mae angen asesiad pellach o effeithiau ansawdd aer os yw’r canlynol yn wir:

Mae cyfraniad eich datblygiad arfaethedig i’r broses yn >1% o lefel critigol a / neu lwyth critigol y safle gwarchodedig.

Pan fydd cyfraniad eich datblygiad arfaethedig i’r broses yn >1% o lefel critigol a / neu llwyth critigol y safle gwarchodedig, dylai cam nesaf eich asesiad gyfrifo’r crynodiad amgylcheddol a ragwelir. Crynodiad amgylcheddol a ragwelir yw cyfraniad eich datblygiad arfaethedig i’r broses ynghyd â lefel gefndir bresennol llygrydd sydd ar y safle gwarchodedig ar hyn o bryd.

Ar ôl cyfrifo’r crynodiad amgylcheddol a ragwelir, os ydych chi wedi penderfynu bod gan eich datblygiad arfaethedig y potensial i achosi ‘effaith arwyddocaol debygol’ ar safle gwarchodedig, mae angen asesiad pellach.

Dylech gyfeirio at asesiad o risg allyriadau aer ar gyfer eich trwydded amgylcheddol i gael canllawiau ar asesu crynodiad amgylcheddol a ragwelir, a’r camau nesaf i’w cymryd ar gyfer unrhyw grynodiadau amgylcheddol a ragwelir nad ydynt wedi’u sgrinio allan fel rhai dibwys.

Ar gyfer unrhyw grynodiadau amgylcheddol a ragwelir nad ydynt wedi’u sgrinio allan fel rhai dibwys, bydd angen i chi gynnal asesiad pellach o effeithiau posibl a / neu gynnig mesurau lliniaru, er mwyn sicrhau na fydd unrhyw effeithiau niweidiol.

Dylid hefyd ystyried unrhyw weithgareddau sy’n allyrru llwch drwy lunio asesiad risg o effaith llwch a chynllun rheoli llwch neu gynllun rheoli amgylcheddol adeiladu sy’n cynnwys mesurau priodol ar gyfer atal a lliniaru llwch. Dylai’r dogfennau hyn asesu’r risg o effaith sylweddol ar rywogaethau sensitif a nodweddion cynefinoedd. Gall yr asesiad hwn fod yn ddogfen annibynnol, neu wedi’i ymgorffori fel adran neu bennod mewn asesiad ansawdd aer cyffredinol. 

Cyngor pellach

Os oes angen rhagor o gyngor arnoch ynghylch effeithiau ansawdd aer wrth baratoi eich cais cynllunio, ewch i’n gwasanaeth i ddatblygwyr sy’n nodi sut y gallwch gael cyngor gennym cyn i chi gyflwyno eich cais cynllunio i’ch awdurdod lleol.

Cysylltwch â ni i wirio a oes angen trwyddedau, cydsyniadau, cymeradwyaethau, neu ganiatadau eraill arnoch. Efallai y codir tâl ar gyfer y gwasanaeth hwn.