Sut rydym yn sgorio ceisiadau am grantiau adfer mawndir

Mae hwn yn gynllun grant cystadleuol.  Bydd pob prosiect yn cael ei sgorio ar gyfer nifer o gwestiynau allweddol o'r ffurflen gais.  Yna bydd prosiectau'n cael eu blaenoriaethu yn ôl y sgoriau a bydd cyllid yn cael ei ddyrannu.

Meini prawf hanfodol

Rhaid bodloni'r rhain er mwyn i gais symud ymlaen i sgorio:

• Mae'r cais am grant rhwng £10,000 a £250,000.
• Rhaid i'r mawndir fod yng Nghymru, gyda dim ond y rhan sydd yng Nghymru o unrhyw gynigion trawsffiniol yn cael ei hystyried.
• Rhaid i'r cynnig fynd i'r afael ag un neu fwy o chwe blaenoriaeth y Rhaglen Weithredu Genedlaethol ar Fawndiroedd.
• Mae tystiolaeth wedi’i chynnwys bod yr ymgeisydd wedi cyflawni o leiaf un prosiect adfer mawndir yn y degawd diwethaf neu wedi darparu cadarnhad ysgrifenedig o gefnogaeth dechnegol gan bartner sydd â phrofiad ymarferol o gyflawni gwaith adfer mawndir ac sy'n gallu cynnig cymorth technegol.

Bydd ceisiadau'n cael eu sgorio a'u trefnu, a byddant yn cael eu hystyried gyda'i gilydd yn y panel neu baneli perthnasol. Byddwn yn ceisio adeiladu portffolio cytbwys o brosiectau sydd, gyda'i gilydd, yn mynd i'r afael â themâu'r Rhaglen Weithredu Genedlaethol ar Fawndiroedd, gan sicrhau cydbwysedd rhwng ardaloedd daearyddol a rhwng prosiectau datblygu a chyflawni.

Byddwn yn gwneud gwiriadau diwydrwydd dyladwy cymesur ar bob ymgeisydd. Tîm grantiau CNC sy’n gwneud ein gwaith asesu ariannol. Mae asesiadau wedi'u teilwra yn ôl y math o bartner, yn cynnwys gwiriadau safonol o ddiwydrwydd dyladwy ac maent yn gymesur, a hynny ar sail gwerth a risg. Rydym yn ymdrin â’r canlynol:

• Adnabod eich ymgeisydd
• Iechyd ariannol
• Ffynonellau eraill o gyllid
• Ardaloedd o bryder arbennig

Ein cwestiynau asesu

1. A yw gwerth y cais am grant rhwng £10,000 a £250,000? Os 'Na', peidiwch â pharhau.
2. A yw'r ardal o fawndir sy’n cael ei hadfer yng Nghymru? Os 'Na', peidiwch â pharhau.
3. A oes dealltwriaeth glir o sut mae'r prosiect yn cyd-fynd â’r Rhaglen Weithredu Genedlaethol ar Fawndiroedd, gan fynd i'r afael yn benodol ag un neu fwy o'i chwe blaenoriaeth? Os 'Na', peidiwch â pharhau.
4. A yw'r ymgeisydd wedi darparu tystiolaeth ei fod wedi cyflawni o leiaf un prosiect adfer mawndir o fewn y degawd diwethaf, neu fel arall, cadarnhad ysgrifenedig o gymorth technegol gan bartner neu gontractwr a all ddangos tystiolaeth o brofiad perthnasol o fod wedi adfer mawndir? Os 'Na', peidiwch â pharhau.
5. A yw'r prosiect yn cynnig gwerth am arian, hynny yw, a yw'r prosiect yn darparu'r gweithgareddau, yr allbynnau a'r canlyniadau cywir? Os yw'r prosiect yn adfer mawndiroedd, beth yw'r gost fesul hectar? (cost fesul hectar = £ cyfanswm cost y prosiect/nifer yr hectarau wedi'u hadfer)
6. A gafwyd neu a wnaed cais am y caniatadau neu’r cydsyniadau perthnasol? Neu os na chafwyd caniatadau eto, a oes cynllun clir ar gyfer eu cael nhw?
7. A yw'r cynnig yn seiliedig ar dystiolaeth o ansawdd da? Pa mor dda y mae'r dystiolaeth a nodwyd wedi'i defnyddio i lywio dyluniad y cynnig?
8. A yw'r allbynnau a'r canlyniadau a ragwelir yn realistig?
9. Ydyn nhw wedi amlinellu’n glir sut byddant yn mesur cynnydd yn erbyn y canlyniadau?
10. Sut fydd y canlyniadau’n cael eu cynnal ar ôl i’r prosiect ddod i ben? A yw'r partner allanol wedi ystyried costau parhaus a sut y byddant yn cael eu hariannu ac a yw'n rhesymol? 
11. Os nad yw CNC yn gallu ariannu'r prosiect hwn, beth yw'r goblygiadau? A fyddai canlyniadau difrifol pe na byddem yn ei gefnogi neu a fyddai'r prosiect yn mynd yn ei flaen beth bynnag?
12. A yw'r gweithgareddau a nodir yng nghynllun y prosiect yn realistig, yn gyraeddadwy ac yn unol ag amcanion y prosiect, hynny yw, a allent gyflawni'r canlyniadau a nodwyd?
13. A yw'r amserlenni a'r cyfnodau hawlio yn realistig ac yn gyflawnadwy? Mae angen hawlio holl gostau'r prosiect erbyn 31 Mawrth 2027.
14. A oes gan y prosiect drefniadau llywodraethu digonol, sy'n cyd-fynd â'i faint a lefel y risg, i gyflawni'r prosiect?
15. A yw’r risgiau wedi'u nodi'n briodol ac a oes mesurau lliniaru priodol ar waith ar eu cyfer?
16. Pwy yw'r partneriaid eraill sy'n ymwneud â'r prosiect hwn, ac a ydyn nhw'n berthnasol ac yn briodol?
17. Pa mor dda mae’r cynnig yn ystyried sut mae pobl o gefndiroedd amrywiol a phob gallu yn cael cyfle i gymryd rhan yn y prosiect?
18. Pa mor dda mae'r cynnig yn ystyried, yn defnyddio ac yn hyrwyddo'r iaith Gymraeg?
19. A yw'r costau manwl ar y dadansoddiad o gostau'r prosiect a uwchlwythwyd yn rhesymol ac yn gyraeddadwy?
20. Beth yw ansawdd y cynnig yn ei gyfanrwydd?

Sut rydym yn sgorio tystiolaeth