Dyletswydd gofal gwastraff i sefydliadau
Rydym yn ceisio eich barn ar gynlluniau i ddiweddaru ein ffioedd ar gyfer rhai o'n trwyddedau a’n gweithgareddau cydymffurfio ar gyfer 2024 - 2025.
Mae'r ymgynghoriad ar gael ar-lein a bydd yn cau ddydd Llun 8 Ionawr 2024.
Eich dyletswydd gofal gwastraff
Os ydych yn cynhyrchu, mewnforio, cario, cadw, trin neu'n gwaredu gwastraff, mae gennych gyfrifoldeb cyfreithiol dros y gwastraff hwn. Yr enw ar hyn yw eich dyletswydd gofal.
Cynhyrchwyr gwastraff
Cynhyrchydd gwastraff yw’r person, neu’r sefydliad, y mae ei weithgarwch yn creu gwastraff. Ni waeth a ydynt wedi’u cyfarwyddo gan rywun arall ai peidio. Os yw person yn creu gwastraff fel gweithiwr, ei gyflogwr yw’r cynhyrchydd gwastraff. Os yw person yn creu’r gwastraff fel contractwr neu is-gontractwr, nhw yw’r cynhyrchydd gwastraff.
Cludwyr gwastraff
Cludwr gwastraff yw unrhyw berson sydd fel rheol yn casglu, yn cario neu’n cludo gwastraff fel rhan o’u busnes neu gyda’r bwriad o wneud elw. Mae hyn yn cynnwys y rhai sy’n cynhyrchu ac yn cludo eu gwastraff eu hunain.
Broceriaid gwastraff
Brocer gwastraff yw unrhyw berson, busnes neu sefydliad sy’n trefnu cludo gwastraff a rheoli gwastraff ar ran parti arall. Gallai’r sefydliad hwn fod yn gorff sy’n contractio gwasanaethau casglu gwastraff, fel awdurdodau lleol, archfarchnadoedd a chynlluniau cydymffurfio â chyfrifoldeb y cynhyrchydd.
Delwyr gwastraff
Gall deliwr gwastraff fod yn unrhyw berson, busnes neu sefydliad sy’n prynu gwastraff gyda’r nod o’i werthu wedi hynny. Mae hyn yn cynnwys amgylchiadau lle nad yw’r deliwr yn cymryd meddiant corfforol o’r gwastraff.
Mae'n rhaid i chi ddilyn rhai rheolau syml
- Ceisiwch gynhyrchu cyn lleied â phosibl o wastraff. Gwnewch bopeth o fewn eich gallu rhesymol i atal, ailddefnyddio, ailgylchu neu adfer gwastraff, yn hytrach na'i waredu. Gelwir hyn yn cymhwyso'r hierarchiaeth wastraff
- Sicrhewch fod y gwastraff yn cael ei ddidoli a'i storio'n ddiogel
- Gwiriwch fod gan y sawl rydych yn trosglwyddo'r gwastraff iddo yr awdurdod priodol i'w dderbyn. Dylai fod yn gludydd gwastraff cofrestredig neu rhaid bod ganddo’r drwydded neu'r esemptiad cywir yn ei le
- Pan fyddwch yn trosglwyddo gwastraff i gludydd gwastraff cofrestredig, gofynnwch i le mae'n mynd â'r gwastraff. Sicrhewch ei fod yn mynd i gyfleuster ag awdurdod priodol, drwy ddod o hyd i fanylion safleoedd gwastraff a ganiateir
- Sicrhewch eich bod yn llenwi nodyn trosglwyddo gwastraff ar gyfer pob achos o drosglwyddo gwastraff nad yw'n beryglus.
Cod ymarfer y ddyletswydd gofal gwastraff
Darllenwch fwy am fodloni gofynion cod ymarfer y ddyletswydd gofal gwastraff (Saesneg in unig).