Cynllun Adnoddau Coedwigaeth De Ebwy

Lleoliad

Mae Cynllun Adnoddau Coedwigaeth De Ebwy yn ymestyn dros 974 ha ac yn cynnwys 11 coetir yng Nghaerffili, Casnewydd, Torfaen ac ardaloedd llywodraeth leol Caerdydd, i’r gogledd o briffordd M4.

Mae’r tir lle ceir y coetiroedd yn gymysgedd o dir ffermio wedi’i wella, gwrychoedd, a choetiroedd llydanddail eraill, yn ogystal â rhywfaint o dir comin heb ei wella ger Coedwig Caerffili.

Mae’r coetiroedd yn agos at ardaloedd mawr trefol gan gynnwys Caerdydd, Casnewydd a Chaerffili, ac o ganlyniad maent yn cynnig lefelau amrywiol o hamdden anffurfiol.

Crynodeb o'r amcanion

Cytunwyd ar yr amcanion rheoli canlynol er mwyn cynnal a gwella gwydnwch ecosystemau a'r manteision y maent yn eu darparu:

Cyflwr, Amrywiaeth a Gwydnwch y Coetir

  • Amrywiaethu cyfansoddiad rhywogaethau’r goedwig i gynyddu gwydnwch yn erbyn plâu a chlefydau, ac effeithiau newid yn yr hinsawdd, ac adeiladu coedwig gadarn ar gyfer cenedlaethau'r dyfodol.
  • Cynyddu amrywiaeth strwythurol drwy fesurau rheoli Coedamaeth Bach eu Heffaith, ac adfywio naturiol, lle y bo'n briodol, ac ystyried graddfa, maint ac amseriad unrhyw lwyrgwympo, gan osgoi cwympo llennyrch cyfagos.
  • Cynnal a gwella ardaloedd o goetiroedd lled-naturiol hynafol ac adfer planhigfeydd ar safleoedd coetir hynafol drwy gael gwared ar goed conwydd yn raddol dros amser, gan ddefnyddio Systemau Coedamaeth Bach eu Heffaith a rheoli gwaith teneuo lle y bo'n bosibl, yn unol â'r Cynllun Rheoli Coetiroedd Hynafol. Tynnu clystyrau hemlog y gorllewin a’r gedrwydden goch lle maent yn cael effaith negyddol ar adfer Coetiroedd Hynafol.
  • Cynyddu'r ardaloedd a nodir ar gyfer teneuo o fewn y cynllun teneuo 5 mlynedd i alluogi gwaith rheoli LISS a gwaith adfer PAWS.
  • Buddsoddi mewn seilwaith coedwigoedd i ddarparu gwell mynediad i ganiatáu ar gyfer presgripsiynau rheoli mwy amrywiol o fewn y safleoedd Coetir Hynafol hyn yn y dyfodol.
  • Cynyddu nifer y coed marw sefydlog a choed marw sydd wedi cwympo ar draws yr ardal drwy arferion rheoli priodol yn ystod gweithrediadau cwympo coed a rheolaeth barhaus yn unol â’r Cynllun Rheoli Coed Marw ar gyfer Ystad Goetir Llywodraeth Cymru.
  • Cynllunio ar gyfer dileu unrhyw ardaloedd sy'n weddill o goed llarwydd sylweddol o dan y Strategaeth Lleihau Coed Llarwydd.
  • Lle mae llarwydd wedi'i gynaeafu, hwyluso'r gwaith o adfer coetiroedd hynafol. Mae ailstocio'r ardaloedd hyn yn flaenoriaeth allweddol er mwyn sicrhau nad oes unrhyw golled net o ran gorchudd coedwig.
  • Cynllunio maint ac amseriad cwympo llennyrch ac ailstocio er mwyn osgoi effeithiau negyddol ar gyflenwadau dŵr yfed a chyflwr dŵr croyw ar hyn o bryd ac yn y dyfodol.

Cynhyrchu Pren yn Gynaliadwy

  • Nodi cyfleoedd lleol i gynnal cyflenwad cynaliadwy o goed, conwydd a llydanddail, drwy gynllunio gwaith cwympo coed a dewis o rywogaethau ailstocio lle nad adfer Coetiroedd Hynafol yw'r brif flaenoriaeth reoli.

Bioamrywiaeth

  • Defnyddio a gwella'r rhwydwaith ffyrdd, rhodfeydd a glannau presennol er budd bioamrywiaeth drwy greu cysylltiadau â chynefin agored ac agor yr ardaloedd hyn i gynyddu faint o le agored sydd yn y coetiroedd. Tynnu coed conwydd ar hyd glannau afonydd lle maent yn gordyfu a gorgysgodi a chynnal a chadw rhodfeydd.
  • Defnyddio cyfleoedd i gysylltu coetir llydanddail â chynefinoedd gwrychoedd a choetiroedd cyfagos er mwyn gwella gwydnwch a chysylltedd.
  • Sicrhau nad yw gweithrediadau coetiroedd yn cael effaith negyddol ar y rhywogaethau adran 7 sy'n bresennol yn y blociau Cynlluniau Adnoddau Coedwig a nodi cyfleoedd i wella eu cynefinoedd.
  • Sicrhau cydymffurfiaeth â gofynion y Gyfarwyddeb Fframwaith Dŵr wrth ymgymryd â gweithgareddau gweithredol drwy ddilyn arferion gorau fel yr amlinellir yn 'Safon Coedwigaeth y DU - Canllawiau Coedwigoedd a Dŵr' i ddiogelu ansawdd dŵr ac ecosystemau dŵr croyw yn y goedwig. Mae cynnal a gwella ansawdd dŵr hefyd yn hanfodol er mwyn gwarchod a diogelu ecosystemau safleoedd dynodedig 'Natura 2000' i lawr yr afon, yn enwedig ACA Afon Wysg.

Cymdeithasol a Diwylliannol

  • Ymgynghori ag Ymddiriedolaeth Archaeolegol Morgannwg Gwent cyn unrhyw weithrediadau yn y 6 man o ddiddordeb archeolegol a nodwyd, fel y’u nodir gan yr Ymddiriedolaeth. Rhaid i bob gweithrediad gydymffurfio â chanllawiau amgylchedd hanesyddol UKFS ac UKWAS. Yn ogystal â'r chwe man o ddiddordeb, dylid nodi a marcio pob nodwedd arall o ddiddordeb a gofnodir, a dylid cadw o leiaf 10m oddi wrthynt yng nghwrs unrhyw weithgareddau wedi’u cynllunio.
  • Cynyddu cyfleoedd i'r cyhoedd ddefnyddio rhodfeydd a ffyrdd ar gyfer hamdden yn ogystal ag asedau sy'n bodoli eisoes.
  • Lleihau unrhyw effaith bosibl ar lifogydd drwy ymgysylltu â rhanddeiliaid ac arferion coedwigaeth da, yn unol â The UK Forestry Standard: The government’s approach to sustainable forestry (2017); Canllaw Ymarfer 25 UKFS a’r Comisiwn Coedwigaeth: Managing Forest Operations to Protect the Water Environment. Bydd gwaith llwyrgwympo uwchben ardal Caerffili yn The Warren yn gofyn am ymwneud ag adran Rheoli Perygl Llifogydd CNC.
  • Archwilio camau gweithredu gyda'n partneriaid yn y Bwrdd Gwasanaethau Cyhoeddus i ddatblygu ymyriadau cydweithredol, ataliol effeithiol sy'n lleihau'r bygythiad o weithgarwch anghyfreithlon gan gynnwys troseddu ac ymddygiad gwrthgymdeithasol ar ein hystâd
  • Gweithio gyda'n partneriaid ym maes Iechyd a Gofal Cymdeithasol drwy Fyrddau Gwasanaethau Cyhoeddus i nodi sut a ble y gall adnodd ein hystad ddarparu atebion sy'n seiliedig ar natur i anghydraddoldebau iechyd
  • Ymchwilio i feithrin perthynas ag Ymddiriedolaeth Coetiroedd Caerffili er mwyn hwyluso dulliau rheoli addas ar gyfer y coetir wrth ymyl SoDdGA Coed y Werin.

Newid yn yr Hinsawdd

  • Nodi cyfleoedd i ymgymryd â chamau ymaddasu i'r newid yn yr hinsawdd yn ystod gweithrediadau rheoli.

Mapiau

Sylwadau neu adborth

Os oes gennych sylwadau neu adborth, gallwch gysylltu â’r tîm Cynllunio Adnoddau Coedwig ar frp@cyfoethnaturiolcymru.gov.uk

Archwilio mwy

Yn yr adran hon hefyd

Diweddarwyd ddiwethaf