Cwcis ar ein gwefan

Mae gwefan Cyfoeth Naturiol Cymru yn defnyddio cwcis. Drwy ddal ati i bori neu drwy glicio, “Parhau” byddwch yn cytuno i storio cwcis parti cyntaf a thrydydd partïon ar eich dyfais i wella’r broses o lywio’r safle, dadansoddi’r defnydd o’r safle, a chynorthwyo yn ein hymdrechion marchnata. Polisi cwcis.

Ymgynghoriad ar drwydded gwastraff Doc Penfro

Mae Cyfoeth Naturiol Cymru (CNC) wedi derbyn cais gan Awdurdod Porthladd Aberdaugleddau am drwydded amgylcheddol i weithredu gorsaf storio a throsglwyddo gwastraff yn Noc Penfro.

Mae'r cwmni eisiau caniatáu i fusnesau sy'n defnyddio'r porthladd storio gwastraff dros dro ar y safle, cyn iddo gael ei drosglwyddo i rywle arall.

Mae'n bwriadu storio gwastraff a ddefnyddir i gynhyrchu ynni. Fel arfer, gwastraff wedi'i brosesu wedi'i fyrnu a gwastraff pren wedi'i brosesu ond heb ei fyrnu yw hwn.  Mae'n cynnwys gwastraff nad yw'n beryglus o gartrefi a busnesau, y gellir ei ddefnyddio fel tanwydd i gynhyrchu trydan mewn cyfleusterau ynni-o-wastraff oddi ar y safle.

Rhaid i bob safle gwastraff gael trwydded cyn gallu gweithredu. Er mwyn cael trwydded rhaid i'r gweithredwyr ddangos bod ganddynt yr isadeiledd, y technegau rheoli ac offer cywir i ddelio â'r gwastraff yn yr ardal arfaethedig. 

Bydd CNC bellach yn dechrau ymgynghoriad chwe wythnos gyda phobl leol, busnesau ac arbenigwyr eraill gan gynnwys Gwasanaeth Tân ac Achub Canolbarth a Gorllewin Cymru, Iechyd Cyhoeddus Cymru, Cyngor Sir Benfro a Bwrdd Iechyd Prifysgol Hywel Dda.

Mae hwn yn gyfle i godi unrhyw bryderon neu roi i CNC unrhyw wybodaeth bwysig mae angen iddo fod yn ymwybodol ohoni wrth asesu cais y cwmni.

Bydd sesiwn galw heibio i'r cyhoedd hefyd yn cael ei chynnal yn Noc Penfro yn ystod yr wythnos yn dechrau 6 Mai.  Manylion llawn i ddilyn.

Dywedodd Andrea Winterton, Rheolwr Gweithrediadau CNC:

“Mae Dyfrffordd Aberdaugleddau, yn ogystal â bod yn ganolbwynt allweddol i'r diwydiant ynni, yn gynefin cyfoethog ar gyfer bywyd gwyllt, ac yn rhan o Ardal Cadwraeth Arbennig Forol Sir Benfro.

“Dim ond os byddwn yn hyderus bod gan y cwmni y cynlluniau a'r mesurau cywir i redeg y safle heb achosi niwed i bobl leol neu'r amgylchedd y byddwn yn rhoi trwydded.

“Bydd ein harbenigwyr nawr yn dechrau eu hasesiad, ond mae gwybodaeth leol yn hynod o werthfawr i ni. Caiff yr holl sylwadau a ddaw i law fel rhan o'n hymgynghoriad eu hystyried wrth wneud ein penderfyniad. ”

Bydd yr ymgynghoriad yn cau ar 21 Mai 2019. Mae copïau electronig o'r cais ar gael ar wefan CNC.

Mae copi caled hefyd ar gael ar gais trwy gysylltu â'r cyfeiriadau post ac e-bost isod.

Mae angen derbyn yr holl sylwadau yn ysgrifenedig erbyn 21 Mai 2019 i permittingconsultations@cyfoethnaturiolcymru.gov.uk neu:

Arweinydd Tîm Trwyddedu (Gwastraff), Cyfoeth Naturiol Cymru, Gwasanaeth Trwyddedu (Caerdydd), Tŷ Cambria, 29 Heol Casnewydd, Caerdydd, CF24 0TP

Archwilio mwy

Cofrestru ar gyfer cylchlythyr

Cofrestru i dderbyn diweddariadau misol gan Cyfoeth Naturiol Cymru

Oes rhywbeth o’i le gyda’r dudalen hon? Rhowch eich adborth.